దశమహా విద్యా స్తోత్రం

Dasa Maha Vidya Stotram / దశమహా విద్యా స్తోత్రం

॥ దశమహావిద్యాస్తోత్రమ్ ॥

ఓం నమస్తే చండికే చండి చండ ముండవినాశిని ।

నమస్తే కాలికే కాలమహాభయవినాశిని ॥ 1॥

శివే రక్ష జగద్ధాత్రి ప్రసీద హరవల్లభే ।

ప్రణమామి జగద్ధాత్రీం జగత్పాలనకారిణీమ్ ॥ 2॥

జగత్ శోభకరీం విద్యాం జగత్సృష్టివిధాయినీమ్ ।

కరాలాం వికటాం ఘోరాం ముండమాలావిభూషితామ్ ॥ 3॥

హరార్చితాం హరారాధ్యాం నమామి హరవల్లభామ్ ।

గౌరీం గురుప్రియాం గౌరవర్ణాలఙ్కారభూషితామ్ ॥ 4॥

హరిప్రియాం మహామాయాం నమామి బ్రహ్మపూజితామ్ ।

సిద్ధాం సిద్ధేశ్వరీం సిద్ధవిద్యాధరఙ్గణైర్యుతామ్ ॥5॥

మన్త్రసిద్ధిప్రదాం యోనిసిద్ధిదాం లిఙ్గశోభితామ్ ।

ప్రణమామి మహామాయాం దుర్గాం దుర్గతినాశినీమ్ ॥ 6॥

ఉగ్రాముగ్రమయీముగ్రతారాముగ్రగణైర్యుతామ్ ।

నీలాం నీలఘనశ్యామాం నమామి నీలసున్దరీమ్ ॥ 7॥

శ్యామాఙ్గీం శ్యామఘటితాం శ్యామవర్ణవిభూషితామ్ ।

ప్రణమామి జగద్ధాత్రీం గౌరీం సర్వార్థసాధినీమ్ ॥ 8॥

విశ్వేశ్వరీం మహాఘోరాం వికటాం ఘోరనాదినీమ్ ।

ఆద్యామాద్యగురోరాద్యామాద్యనాథప్రపూజితామ్ ॥ 9॥

శ్రీం దుర్గాం ధనదామన్నపూర్ణాం పద్మాం సురేశ్వరీమ్ ।

ప్రణమామి జగద్ధాత్రీం చంద్రశేఖరవల్లభామ్ ॥ 10॥

త్రిపురాం సున్దరీం బాలామబలాగణభూషితామ్ ।

శివదూతీం శివారాధ్యాం శివధ్యేయాం సనాతనీమ్ ॥11॥

సున్దరీం తారిణీం సర్వశివాగణవిభూషితామ్ ।

నారాయణీం విష్ణుపూజ్యాం బ్రహ్మవిష్ణుహరప్రియామ్ ॥12॥

సర్వసిద్ధిప్రదాం నిత్యామనిత్యాం గుణవర్జితామ్ ।

సగుణాం నిర్గుణాం ధ్యేయామర్చితాం సర్వసిద్ధిదామ్ ॥ 13॥

విద్యాం సిద్ధిప్రదాం విద్యాం మహావిద్యాం మహేశ్వరీమ్ ।

మహేశభక్తాం మాహేశీం మహాకాలప్రపూజితామ్ ॥ 14॥

ప్రణమామి జగద్ధాత్రీం శుమ్భాసురవిమర్దినీమ్ ।

రక్తప్రియాం రక్తవర్ణాం రక్తబీజవిమర్దినీమ్ ॥ 15॥

భైరవీం భువనాం దేవీం లోలజివ్హాం సురేశ్వరీమ్ ।

చతుర్భుజాం దశభుజామష్టాదశభుజాం శుభామ్ ॥ 16॥

త్రిపురేశీం విశ్వనాథప్రియాం విశ్వేశ్వరీం శివామ్ ।

అట్టహాసామట్టహాసప్రియాం ధూమ్రవినాశినీమ్ ॥ 17॥

కమలాం ఛిన్నభాలాఞ్చ మాతఙ్గీం సురసున్దరీమ్ ।

షోడశీం విజయాం భీమాం ధూమాఞ్చ వగలాముఖీమ్ ॥ 18॥

సర్వసిద్ధిప్రదాం సర్వవిద్యామన్త్రవిశోధినీమ్ ।

ప్రణమామి జగత్తారాం సారాఞ్చ మన్త్రసిద్ధయే ॥ 19॥

ఇత్యేవఞ్చ వరారోహే స్తోత్రం సిద్ధికరం పరమ్ ।

పఠిత్వా మోక్షమాప్నోతి సత్యం వై గిరినన్దిని ॥ 20॥

ఇతి దశమహావిద్యాస్తోత్రం సమ్పూర్ణమ్ ।