sri devi stotras / Tripurasundari ashtakam
kadambavanacāriṇīṁ munikadambakādambinīṁ
nitambajitabhūdharāṁ suranitambinīsēvitām
navāmburuhalōcanāmabhinavāmbudaśyāmalāṁ
trilōcanakuṭumbinīṁ tripurasundarīmāśrayē || 1 ||
kadambavanavāsinīṁ kanakavallakīdhāriṇīṁ
mahārhamaṇihāriṇīṁ mukhasamullasadvāruṇīm
dayāvibhavakāriṇīṁ viśadarōcanācāriṇīṁ
trilōcanakuṭumbinīṁ tripurasundarīmāśrayē || 2 ||
kadambavanaśālayā kucabharōllasanmālayā
kucōpamitaśailayā gurukr̥pālasadvēlayā
madāruṇakapōlayā madhuragītavācālayā
kayāpi ghananīlayā kavacitā vayaṁ līlayā || 3 ||
kadambavanamadhyagāṁ kanakamaṇḍalōpasthitāṁ
ṣaḍamburuhavāsinīṁ satatasiddhasaudāminīm
viḍambitajapāruciṁ vikacacandra cūḍāmaṇiṁ
trilōcanakuṭumbinīṁ tripurasundarīmāśrayē || 4 ||
kucāñcitavipañcikāṁ kuṭilakuntalālaṅkr̥tāṁ
kuśēśayanivāsinīṁ kuṭilacittavidvēṣiṇīm
madāruṇavilōcanāṁ manasijārisammōhinīṁ
mataṅgamunikanyakāṁ madhurabhāṣiṇīmāśrayē || 5 ||
smarētprathamapuṣpiṇīṁ rudhirabindunīlāmbarāṁ
gr̥hītamadhupātrikāṁ madavighūrṇanētrāñcalām
ghanastanabharōnnatāṁ galitacūlikāṁ śyāmalāṁ
trilōcanakuṭumbinīṁ tripurasundarīmāśrayē || 6 ||
sakuṅkumavilēpanāmalikacumbikastūrikāṁ
samandahasitēkṣaṇāṁ saśaracāpapāśāṅkuśām
aśēṣajanamōhinīmaruṇamālya bhūṣāmbarāṁ
japākusumabhāsurāṁ japavidhau smarāmyambikām || 7 ||
purandarapurandhrikāṁ cikurabandhasairandhrikāṁ
pitāmahapativratāṁ paṭupaṭīra carcāratām
mukundaramaṇī maṇī lasadalaṅkriyākāriṇīṁ
bhajāmi bhuvanāmbikāṁ suravadhūṭikācēṭikām || 8 ||
